Aqyarda COVID-19 ile hasta eki pensiyalı vefat etti. Bunı şeerniñ rusiyeli akimiyetinde haber ettiler.
"Ölüm sebebi, pnevmoniya ve aqciger şişiklikgi ile müşkülleştirilgen koronavirus infektsiyasıdır", - denile beyanatta.
Akimiyetniñ malümatına köre, şeerde bir künde üç yañı koronavirus hastası qayd etildi.
Tünevin Qırımda 23 yañı koronavirus infektsiya adisesi qayd etildi. Aqyarda - üç.
Umumen, Qırım akimiyetiniñ malümatına köre, Qırımda 1139 COVID-19 hastası qayd etildi, Aqyarda - 339.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
