Aqyarda bir künde 164 COVID-19 hastası qayd etildi, altı insan vefat etti. Bu aqta şeerniñ Rusiye ükümetiniñ matbuat hızmeti bildirdi.
Qayd etilgenine köre, pandemiya başlağanından Aqyarda 20 801 koronavirus hastası qayd etildi, 18 152 kişi tüzeldi, 852 insan vefat etti.
Qırımnıñ Rusiye yolbaşçısı Sergey Aksenov keçken künü Qırımda 379 yañı koronavirus hastası qayd etildi, dep bildirdi.
Daa evel berilgen malümatqa köre, Aqyar hastahaneleri COVID-19 hastaları içün qoşma tibbiy oksigen ketirilüvini ödep yetiştirmey.
Aqyarda COVID-19 hastalarınıñ sayısı artqanı içün yañı koronavirus sıñırlavları kirsetildi, eskileri ise 2021 senesi avgustnıñ 31-ne qadar uzatıldı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
