Tünevin Aqyarda altı yañı COVID-19 adisesi qayd etildi, bildire Aqyar akimiyetiniñ matbuat hızmeti.
"Hastalanğanlarnıñ episi - yerli sakinler. Üç adam memleketniñ başqa bölgelerine barğanında hastalıqqa oğradı, daa üçü Aqyardan çıqmay edi", - denile beyanatta.
Şeer akimiyeti COVID-19 diagnozı olğan pensionerniñ vefatı aqqında bildirdi.
"Tasdıqlanğan diagnozı olğan daa bir adam vefat etti. Bu 65 yaşındaki 9-ıncı şeer hastahanesiniñ emşiresi. O "qızıl" mıntaqada çalıştı. Hastalıq hronik hastalıqlarınen müşkülleştirildi", - denile beyanatta.
Aqyara akimiyetine köre, şeerde yılnıñ başından berli 433 adam koronavirus infektsiyasınen hastalandı, 341 adam yahşı oldı, 13 adam vefat etti.
Akimiyetniñ malümatına köre, şimdilik infektsiya hastahanesinde 171 adam baqıla, 9-ıncı şeer hastahanesine 147 yata, yaşağan yerlerinde 316 adam közetile. Daa 10 adam yahşı oldı.
Umumen Qırımda, yerli akimiyetniñ malümatına köre, 1820 yañı koronavirus hastası qayd etildi. 83-ü çetelden keldi, 114-ü qomşu Rusiyeden kelgenler ve olarnen alâqada olğanlar. 1245 kişi tüzeldi, 21 hasta koronavirustan vefat etti. Aqyarda yılnıñ başından 427 insan yañı koronavirus yuqunçına oğradı, 331 insan tüzeldi, 12 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
