Noyabrniñ 4-ünde saba Aqyarda 83 yañı COVID-19 hastası qayd etildi, dep bildire Aqyarnıñ Rusiye ükümeti. Olardan 26-sı infektsiya hastahanesine ve 9-ıncı hastahanege qoyuldı, qalğanları - ambulator şeklinde tedaviylene.
«Hastalanğanlar - 7-den 88 yaşına qadar adamlar. 165 adam yahşı olıp hastahaneden çıqarıldı. 75 yaşındaki qadın vefat etti. Umumen Aqyarda yılnıñ başından berli yañı koronavirus infektsiyasınen 2718 adam hastalandı. Şimdilik 1822 adam yahşı oldı, 72 adam vefat etti", - denile beyanatta.
Keçken künü Qırımda 202 koronavirus hastası qayd etildi. Epidemiya vaqtında 10157 COVID-19 hastası qayd etildi, 5881 insan tüzeldi. Aqyarda 2635 kişi yañı koronavirus yuqunçına oğradı. Al-azırda 1657 kişi tüzeldi, 71 insan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
