Oktâbrniñ 29-nda gece ve saba Aqyarda patlav sesleri eşitilgen. Qırım.Aqiqat mühbiriniñ haber etkenine köre, sesler ava mudafaası sistemasınıñ işine beñzey edi.
"Saba saat 4:30-ta Aqyarnıñ cenübiy tarafında, Streletskaya körfezi ve Karantinnaya körfezi civarında avada küçlü patlav sesleri eşitildi. Bu yerlerde Nahimov oquv yurtu ve rusiye arbifleri yerleşe. Saba ava mudafaası sistemasınıñ işi devam etti", - dep aytıp berdi mühbir.
Qırım.Aqiqatnıñ daa bir mühbiri, saba saat 4:39-da atış sesleri de eşitilgenini bildirdi. Soñra saat 5:10-da raketa sesleri de eşitilgen.
Aqyarnıñ Rusiye yolbaşçısı Mihail Razvojayevniñ sözlerine köre, pilotsız uçaqlar ücüm etkenler
"Qara deñiz flotunıñ gemileri Aqyar körfezinde pilotsız uçaqlarnıñ ücümlerini def eteler. Sakin qalmağa tırışamız. Şeerde iç bir şey zarar körmedi. Vaziyet nezaretimiz astında", - dep yazlıoa onıñ bildirmesinde.
Oktâbrniñ 27-nde Aqyarıñ rusiye akimiyeti Balıqlava İssilik elektrostantsiyasına pilotsız uçaqlar ücüm etkenini bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
