Aqyarda Çeçekniñ 29-nda bütün gece ava ücümi telükesi devam etti, Qırımnıñ çeşit rayonlarında ise patlavlar, ateş ve RF ava mudafaasınıñ işi eşitildi. Bunı Rusiye akimiyeti ve yerli telegram kanalları bildire.
Böylece, yerli vaqıtqa köre saat 23:15 RF nezaretindeki Aqyar yolbaşçısı Mihail Razvojayev şeerde ava telükesi ilân etilgenini bildirdi. Saat 23:42 o, Rusiye arbiyleri Qaçi ve Balıqlava rayonlarında eki dronnı urıp tüşürgenlerini bildirdi. Bu beyanatnıñ tasdıqı berilmedi. Daa soñra Razvojayev de deñiz uçaqlarınıñ qullanuv telükesi sebebinden "deñiz telükesi" aqqında ilân etti.
Avadan ücüm telükesi saba saat 5:06 qadar devam etti. Saat 8:42 Razvojayev bildirdi ki, gece devamında Rusiye ava mudafaası Balıqlava mudafaası ve Şimaliy tarafında 23 uçucısıznı ve yalıdan uzaq olğan 3 ekipajsız katerni yoq etti. Cenk şaraitlerinde bu beyanatnıñ doğrulığını teşkermek qıyın. Ne qadar dron tüşürilmegenini Razvojayev añlatmadı.
Öz nevbetinde, "Krımskiy veter" telegram-kanalı Rusiyeniñ "Kirovskoye", "Sarabuz", "Saq" ve "Belbek" arbiy uçaq alanları rayonlarında olğan patlavlar aqqında haber etti. Bundan ğayrı, Kefe, Eski Qırım poligonında, ve Aqyar civarındaki Andreyevkada patlavlar ve atışlar aqqında haber etile edi. Bu malümatnıñ daa bir tasdıqlanması kerek.
Ukrayinağa qarşı Rusiyeniñ keñ kölemli basuvı başlanğan soñ Rusiyede ve o, işğal etken topraqlarda çeşit obyektler ava ücümlerine oğray. Eñ sıq 2024 ve 2025 seneleri ücüm sebebi cermay zavodları ola. Ukrayinanıñ işğal altındaki topraqlarında da Rusiye obyektleri ücümlerge oğray.
Ukrayina Silâlı quvetleriniñ Baş ştabı darbelerniñ büyük qısmını tasdıqlap, Ukrayina Mudafaa quvetleri "Rusiye işğal ordusınıñ arbiy küçüni eksiltecek, Rusiyeni Ukrayinağa qarşı silâlı istilâğa mecbur etecek tedbirlerni muntazam sürette ala", dep bildire.