Aqyarda oktâbrniñ 30-nda saba 80 COVID-19 hastası qayd etildi. Bu yañı antirekord oldı, dep bildire şeerniñ Rusiye ükümeti.
Akimiyetniñ malümatına köre, 36 hasta yuqunç ve doquzıncı şeer hastahanesine alındı, 44 kişi ambulator tedaviylevde buluna. Hastalar – 3 yaşından 88 yaşına qadar yerli sakinler.
«67 ve 81 yaşında eki insan vefat etti. Hastalıqnı hronik hastalıqları ağırlaştırdı», – dep aytıla haberde.
Bugünki künde COVID-19 diagnozı tasdıqlanğan 272 insan hastahanede buluna: 126-sı yuqunç hastahanesinde, 142-si doquzıncı şeer hastahanesinde, eki kişi Mudafaa nazirliginiñ hastahanesinde buluna. «İzumrudda» 35 hasta yata. 520 insan ambulator tedaviylevde buluna. 554 insan közetile – hastalarnen alâqada olğan, amma COVID-19 diagnozı tasdıqlanmağanlar.
Umumen, akimiyetniñ malümatına köre, yılnıñ başından Aqyarda 2318 insan yañı koronavirus yuqunçına oğradı. 1445 kişi tüzeldi, 65 insan vefat etti. «Solnışko» pansionatı observator rejiminde çalışa.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
