Aqyarda fevralniñ 1-nde saba 101 yañı COVID-19 hastası qayd etildi. Tüzelgen 15 kişi yiberildi. 64 yaştan 91 yaşqa qadar üç insan vefat etti, dep haber ete şeerniñ Rusiye ükümeti.
«Umumen Aqyarda 9805 insan yañı koronavirus yuqunçına oğradı. Al-azırda 8739 kişi tüzeldi, 396 insan vefat etti. Bugünki künde COVID-19 tasdıqlanğan 416 insan hastahanelerde buluna. Alı yengil hastalar bölüginde 104 kişi yata», – dep aytıla haberde.
Müessise malümatına köre, 634 insan közetile, 1780 kişi COVID-19 aşısı oldı, 692 insan ekinci aşısını aldı, al-azırda oca ve tibbiyet hadimlerine aşı yapıla.
Yanvarniñ 30-nda 101 yañı COVID-19 hastası qayd etildi, yanvarniñ 29-nda 103 hasta qayd etilgen edi.
Keçken künü Qırımda 156 yañı koronavirus hastası qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
