Aqyarda mayısnıñ 14-nde 25 COVID-19 hastası qayd etildi. Bu aqta şeerniñ Rusiye ükümetiniñ matbuat hızmeti bildire.
Qayd etilgenine köre, bir künde 70 ve 84 yaşlarında eki insan vefat etti, 28 kişi tüzeldi.
Umumen Aqyarda 14406 insan yañı koronavirus yuqunçına oğradı, 657 kişi vefat etti, 13369 insan yahşı oldı.
Hatırlatamız, mayısnıñ 13-nde Aqyarda 23 koronavirus hastası qayd etildi ve bir kişi vefat etti.
Kreml kontrolindeki Aqyar şeer yolbaşçısı Mihail Razvojayev koronavirus pandemiyası sebebinden yüksek seviyeli azırlıq rejimi 2021 senesi mayısnıñ 31-ne qadar uzatıldı.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
