Aqyarda fevralniñ 19-nda 69 COVID-19 hastası qayd etildi. Bu aqta şeerniñ Rusiye ükümetiniñ matbuat hızmeti bildire.
Qayd etilgenine köre, bir künde 60 yaştan 87 yaşqa qadar dört insan vefat etti, 36 insan tüzeldi.
Umumen Aqyarda 11436 insan yañı koronavirus yuqunçına oğradı, 469 kişi vefat etti, 10293 insan yahşı oldı.
Hatırlatamız, fevralniñ 18-nde Aqyarda 74 koronavirus hastası ve üç vefat qayd etildi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
