Keçken künü Aqyarda bir yañı COVID-19 hastası qayd etildi. Bu aqta Aqyarnıñ Rusiye ükümetiniñ matbuat hızmeti bildire.
«Hasta bundan evel hastalanğan kişinen alâqada olğan ve epidemiologik tahqiqat çerçivesinde observatsiyada bulunğan edi», – dep aytıla haberde.
Berilgen malümatqa köre, yılnıñ başından Aqyarda 130 kişi yañı koronavirus yuqunçına oğradı. 35 insan tüzeldi, 2 kişi vefat etti.
90 insan yuqunç hastahanesinde közetüv altında buluna, №9 şeer hastahanesinde – 101. 899 insan yaşağan yerinde közetile.
Müessise, Aqyarda «İzumrud» pansionatı ve Rusiye Mudafaa nazirliginiñ Omega körfezinde ve Belbekteki qurucılıqlar obsevator rejiminde çalışa, dep hatırlattı.
Böylece, al-azırda Qırımda 239 koronavirus hastası qayd etildi. 24-ü çetelden keldi, 21-i – Rusiyeden. Eki kişi vefat etti, daa ekisiniñ vefat sebebi şimdilik belli degil, amma COVID-19 qayd etilgen edi. 78 insan tüzelip yahşı oldı. Aqyarda – 129 koronavirus hastası bar, eki kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
