Noyabrniñ 30-nda saba Aqyarda 65 yañı COVID-19 hastası qayd etildi. 4 kişi yuqunç ve doquzıncı şeer hastahanelerine alındı, qalğanları ambulator tedaviylevde buluna, dep bildire şeerniñ Rusiye ükümeti.
«Hastalar – altı yaşından 84 yaşına qadar insanlar. 17 kişi tüzelgen soñ yiberildi. 58 yaşında er adamı vefat etti», – dep aytıla haberde.
Yerli akimiyetniñ malümatına köre, yılnıñ başından Aqyarda 4346 insan yañı koronavirus yuqunçına oğradı, 3789 kişi tüzeldi, 120 insan vefat etti.
COVID-19 diagnozı tasdıqlanğan 162 insan hastahanede buluna, 249 kişi ambulator tedaviylevde qala, 570 insan közetile.
Keçken künü Qırımda 227 koronavirus hastası qayd etildi. Umumen 15372 COVID-19 hastası qayd etildi. 11422 insan tüzelgen soñ yiberildi, 286 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
