Aqyarda 95 yañı koronavirus hastası qayd etildi, tünevin 74 yaştan 93 yaşqa qadar 8 adam öldi. Bunı şeerniñ Rusiye ükümeti haber etti.
Berilgen malümatqa köre, yanvarnıñ 13-nde 129 kişi hastahaneden çıqarılğan.
“Pandemiya başlağanından berli Aqyarda episi olıp 8034 kişi hastalândı, 7287 tedaviylendi ve 302 öldi”, – yazıla bildirmede.
Bugünde tasdıqlanğan COVID-19 ile 277 hasta statsionarlarda, yengil hastalar içün bölükte 217 kişi yata, 574 közetile.
Pandemiya başlağanından berli Qırımda resmiy şekilde 28180 hasta qayd etilgen, 22690 tüzelgen ve 613 ölgen. Aqyarda yılnıñ başından 7939 adam yañı koronavirus yuqunçına oğrağan, 7158 tedaviylengen, 294 ölgen.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
