Aqyarda aprelniñ 26-nda saba yañı COVID-19 hastaları qayd etilmedi. Yuqunç hastahanesinde diagnozı tasdıqlanğan 24 kişi buluna.
Aqyarnıñ Rusiye ükümeti bildirgenine köre, 1126 insan evde tibbiy közetüv altında buluna, 123 kişi ise yuqunç hastahanesinde ekimlerniñ közetüvi altında qala.
«İzumrud» pansionatı ve Svâto-Georgiyevskiy manastırı observator olaraq çalışalar.
Umumen Qırımda 69 koronavirus hastası qayd etildi, Aqyarda – 31.
Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
