Aqyarda yerli saatnen gece 1:55-lerde ballistik raketalarnıñ ücüm havfı sebebinden ava telükesi ilân etildi, dep bildirdi Rusiye kontrolindeki şeerniñ yolbaşçısı Mihail Razvojayev.
Telüke 31 daqqa devam etti – saba saat 2:26-da lâğu etildi. Bunıñnen beraber, Rusiyeniñ monitoring telegram kanalları Qırım ve Aqyar içün raketa telükesi aqqında haber ettiler.
Böyleliknen, «Krımskiy veter» Telegram kanalı yerli sakinlerniñ aytqanlarına esaslanıp, Canköyde «evlerni sarsıtqan» üç patlav ve Rusiye ava mudafaasınıñ sesleri eşitildi, dep bildirdi. Bundan ğayrı, Canköy rayonınıñ Qalay (Azovskoye) köyü yanında parlaq yaltıravlar olğanı aqqında bildirildi. Bu malümatnı alternativ menbalardan tasdıqlamaq daa mümkün degil.
Rusiye akimiyeti ve arbiyleri Canköy ve Canköy rayonındaki vaziyetni izaatlamadılar.
Bir kün evelsi Qırım telegram kanallarında da Canköy ve Canköy rayonında patlav ve Rusiye ava mudafaasınıñ sesleri aqqında haber etti.
Qırım.Aqiqatnıñ malümatına köre, Canköy yaqınlarında arbiy uçaq alanı bar, anda Arbiy ava quvetleriniñ 4-ünci komandanlığınıñ 27-nci qarışıq aviatsiya diviziyasınıñ 39-ncı vertolöt polku, Cenübiy arbiy okrugınıñ ava mudafaası, Mi-8, Mi-35M, Mi-28, Ka-52 içün üç aviatsiya eskadrilyası bar. Rusiye FSB sıñır hızmetiniñ vertolötları da yerleşe.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
