Aqyarda mayıs 19-ında arbiy tehnikanen bala paradı ve “Ölümsiz polk” yürüşi yapıldı. Qırım.Aqiqat mühbiri haber etkeni kibi, şeerniñ rusiyeli akimiyeti, bala paradı Ekinci cian cenkinde ğalebeniñ 75 yıllığına bağışlana, dep bildire.
Yürüşniñ açılışı arbiy qaideleri boyunca yapıldı. Parad reberi - “Yunarmiya” azası, Aqyar memuriyeti, askerler ve din adamları turğan basamaqqa adımlap bardı.
Arbiy maşnalarnen qomşu Rusiye askerleri urbasında büyük sınıf talebeleri keldi. Birinci sıralarda arbiy kiyimli mektep ve bala bağçası talebeleri yürdi.
Olardan soñ "Yunarmiya" vekilleri kolonnası, rekonstruktor klublarınıñ azaları ve "Zarnitsa" ve "Rubej" Rusiye vatanperver areketleriniñ faalleri.
Ayrıca veteranlarnıñ süretlerinen "Ölümsiz polk" keçti. Bala paradına arbiy ve kazak kiyimli bala bağsası talebelerini ketirdiler.
Paradnıñ soñunda genç sportçular, alimler, sanatkârlar ve bala-geñç klublarınıñ azaları kete edi.
Arbiy paraddan ğayrı Primorskiy bulvarında bala icadı sergisini yaptılar. İstegenlerniñ alattan keçmek, üfüriklerni üfürmek ve deñiz tüyümlerini bağlamaq imkânı bar edi.
