Aqyarda avgustnıñ 9-nda gece saat birlerde ava telükesi ilân etildi, Rusiye monitoring telegram kanalları Qırım yarımadasında raketa telükesi aqqında haber etti.
Şeerniñ rusiyeli başı Mihail Razvojayevniñ telegram kanalında ava telükesi aqqında haber yerli vaqıt ile gece 1:05 peyda oldı. Yerli sakinler, şeerde yüksek sesler eşitile, dep bildirdi. Daa soñra Razvojayev RF arbiyleri Qara deñiz üzerinde "Neptun" raketası urıp tüşürilgenini bildirdi. Bu malümat tasdıqlanmağan. Saat 1:49-da ava telükesi lâğu etildi. Rusiye ve Ukrayina arbiyleri bu haberni izaatlamadı.
Aqyarda avgustnıñ 9-nda gece saat birlerde ava telükesi ilân etildi. Gece saat 2:07-de "Krımskiy veter" telegram kanalı Qırımnıñ ğarbındaki Çernomorsköye qasabasında ateş açılğanı ve patlav aqqında bildirdi.
Rusiye nezaret kanallarında urıp tüşürilgen UAV ve yoq etilgen deñiz dronu aqqında bildirdiler, lâkin bu haberler tasdıqlanmadı.
Saba Razvojayev bildirdi ki, Rusiye arbiyleri Qara deñizde 3 pilotsız uçaqnı ve ekipajsız 3 katerni yoq etti. Rusiye Mudafaa nazirligi ise, Qırım üzerinde beş uçucısız uçaq tüşürildi, Qara deñizde daa sekiz uçaq tüşürildi, dep bildirdi. Qara deñizde ekipajsız yedi kater yoq etildi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
