Aqyarda yarım saattan ziyade uçucısız ücümi sebebinden ava telükesi ilân etildi. Rusiye kontrolindeki şeer yolbaşçısı Mihail Razvojayevniñ aytqanına köre, ava telükesi saat 14:27-de ilân etilgen edi. Rusiye monitoring telegram kanalları uçucısız ücüm telükesi aqqında yaza.
"Krımskiy veter" telegram kanalı abunecileriniñ malümatına esaslanıp, Felenk burnundan ve Qaya Baş töpesinden Rusiye ava mudafaasınıñ işi aqqında bildirip, videosını derc etti. Cenk vaziyetinde malümatnı teşkermek zor. Bundan ğayrı haber etilgenine köre, saat 14:45-te "Kaça" Rusiye arbiy uçaq alanından Bağçasaray tarafına uçqan vertolötlar köterilgen edi.
Saat 15:01-de Razvojayev ava telükesi lâğu etildi, dep ilân etti. Ücümniñ aqibetleri aqqında haber etilmedi. Rusiye arbiyleri vaziyetni resmiy şekilde izaatlamadı.
Berilgen malümatqa köre, Qırım yarımadasınıñ ğarbindeki "Belbek" ve "Kaça" uçaq alanları rayonlarında yanvarniñ 20-nde saba patlavlar eşitildi, dep haber ete "Krımskiy veter" telegram kanalı. Rusiye Mudafaa nazirligi eñ az doquz dron Qırımğa ücüm etti, dep bildirdi.
2022 senesi arman ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı.
