Aqyarda ava telükesi ilân etildi, dep bildirdi Rusiye kontrolindeki şeer yolbaşçısı Mihail Razvojayev, Qırımnıñ Rusiye akimiyeti Keriç köprüniñ qapatılğanını bildire.
Bunıñnen beraber Rusiye monitoring Telegram kanalları Donuzlav, Kezlev, Saq rayonı, Novofedorovka, Aqşeyh, Or Qapı, Canköy ve Aqmeçit rayonlarında raketa telükesi aqqında yaza. «Neptun» raketalarınen ücüm telükesi bar, dep aytıla. Olarnıñ malümatına köre, 5 «Neptun» raketası Qırımnı keçip, Aqyardan cenüp tarafında şarqqa uça.
Yañı malümat: saat 22:23-te Razvojayev ava telükesi bitti, dep haber etti, Rusiye monitoring kanalları «Neptun» raketaları Rusiyeniñ Krasnodar ülkesindeki Novorossiysk şeerine yaqınlaşa.
Mayısnıñ 3-nde haber etilgenine köre, Qırım eki geceden berli uçucısızlarnıñ ücümine oğray, eki gece devamında bir sıra mesken yerde patlav ve Rusiye ava mudafaasınıñ iş sesleri eşitilgen edi.
Mayısnıñ 2-ne keçer gecesi Qırım ve Aqyar uçucısızlarnıñ kütleviy ücümine oğradı, yerli Telegram kanalları patlav ve Rusiye ava mudafaasınıñ iş sesleri aqqında yazğan edi, Aqyarnıñ Rusiye yolbaşçısı Mihail Razvojayev ise saat 2:38-den 4:54-ke qadar devam etken ava telükesi aqqında bildirgen edi.
«Krımskiy veter» Telegram kanalı abunecileriniñ malümatına esaslanıp, Kefe, Aqmescit, Sarabuz, Canköy, Saq ve Saq rayonı, Novofedorovka, Ermeni Bazar, Tarhan Qut ve Ulu Qol (Lukull) burunları, Acı Bolat (Uglovoye) ve Çalğarı (Krasnoye) köylerinde patlavlar aqqında bildirdi. Kaça, Belbek, Novofedorovka ve Sarabuz yaqınlarında Rusiye arbiy uçaq alanlarına qarşı ücüm aqqında haber etildi. Darbe neticeleri şimdilik belli degil.
Mayısnıñ 2-nde saba Rusiye Federatsiyasınıñ Mudafaa nazirligi Qırımda 89 ve Qara deñizde 23 tüşürilgen dron aqqında haber etti. Müessiseniñ malümatını başqa menbalar vastasınen tasdıqlamaq imkânsız ola. Ukrayina arbiyleri bu malümatnı şimdilik izaatlamadı.
2022 senesinden başlap yarımada aman-aman er kün uçucısız ve raketalarnıñ ücümine oğray, çoqusı alda Rusiye Federatsiyasınıñ Mudafaa nazirligi ya da Rusiye akimiyeti, bu malümat olsa da, arbiy obyektlerge darbe endirilgenini tasdıqlamay.
Qırımtatar Milliy Meclisiniñ reisi Refat Çubarov Ukrayina Silâlı quvetleriniñ darbeleri quvetleşkeni içün Qırım sakinlerini telükesizligini tüşünip, yarımadadaki Rusiye arbiy obyektlerinden köçmege tevsiye etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
