Sirena saat 20:58 açıldı. Signal eki daqqa devam etti. Soñra sirenalar kene başladı. Mühbirniñ bildirgenine köre, saat 21:26 sirenalar daa devam etti, «Diqqat! Ava telükesi!» dep aytıldı.
Bundan ğayrı, saat 21:37-de şeerde eki patlav eşitildi.
Aqyarnıñ Rusiye akimiyeti bildirgenine köre, yerli sakinler içün üç çeşit ava telükesi signalı olacaq.
Razvojayevniñ aytqanına köre, şeer reberligi Rusiye arbiylerinden ava telükesi aqqında haber alacaq, Razvojayev ise signal içün emir berecek.
Sentâbrniñ 22-nde kündüz işğal etilgen Aqyarda bir qaç patlav aqqında belli oldı. Şeerniñ Rusiye valisi Mihail Razvojayev Telegramda Rusiye Qara deñiz flotunıñ ştabına qarşı raketa darbesi aqqında bildirdi.
Rusiye Mudafaa nazirligi darbeden soñ bir arbiy ğayıp oldı, ava mudafaa quvetleri beş raketanı urıp tüşürdi, dep bildirdi. Lâkin uydu fotoresimleri ve videolarda bir qaç raketa nişanını urdı. Aynı vaqıtta içtimaiy ağlarda darbe neticesinde altı yaralanğan kişi bar, dep yaza. Rusiye Qara deñiz flotunıñ ştab zararları aqqında malümatnı mestaqil menbalarda tasdıqlamaq imkân yoq.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
