Aqyarda oktâbrniñ 20-nde saat 17:23-te ava telükesi signalı yanğıradı, dep haber ete Qırım.Aqiqat mühbiri.
Bu aqta Aqyarnıñ Rusiye yolbaşçısı Mihail Razvojayev de bildirdi. Rusiye ve yerli Telegram kanalları Qara deñizde Rusiye ava mudafaası çalışa, dep bildirdi. Şimdilik tasdıqlanğan bir malümat yoq.
Bundan ğayrı, Qırımnıñ Rusiye Naqliyat nazirligi Keriç (Qırım) köpründe areket toqtatıldı, dep bildirdi. Rusiye akimiyeti böyle areketler raketa telükesinen bağlı, dep ayta.
Oktâbrniñ 18-nde Aqyarda eki kere ava telükesi yanğıradı, şeer sakinleri Saharnaya Golovka qasabası rayonında patlav aqqında bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
