Aqyarda saat 20:30-da ava telükesi ilân etildi. Moskva tayin etken Aqyar valisi Mihail Razvojayevniñ Telegram kanalında haber etkenine köre, şeerde "arbiyler Ukrayina Silâlı quvetleriniñ ücümini keri qaytara, ava mudafaası çalışa".
Yerli saifeler de dron ücümi aqqında yazdı. "Krımskiy veter" Telegram kanalı bildirgenine köre, "Belbek" ve "Kaça" uçaq alanları darbe altında buluna.
"Belbek" uçaq alanında sanki baqmayıp ateş eteler – farqlı taraflarğa ve boş yerge", – dep yaza "Krımskiy veter" abunecileriniñ malümatına esaslanıp.
"Kaça" uçaq alanında da ateş etmege ve nişanlarğa ışıq tutmağa devam eteler", – dep bildirdi "Krımskiy veter".
Aynı vaqıtta "ÇP/Krım" Telegram kanalı Rusiye Qara deñiz flotunıñ ava bazası yerleşken Anğara qasabası ve Tavriya issilik elektrostantsiyası ve Aqmescit içün uçucısız telükesi aqqında bildirdi.
"Respublika Krım, Sevastopol Opoveşçeniya, trevogi" Telegram kanalı dronlar Kök Ağaç dağları (Mikenziyevıye gorı), Üç Quyu, İnkerman, Balıqlava issilik elektrostantsiyası ve "Belbek" uçaq alanı tarafında qayd etile, dep bildirdi.
Yañı malümat: yerli saatnen 23:49-da Razvojayev Aqyarda ava telükesi bitti, dep bildirdi. Ücüm tafsilâtları aqqında haber etilmey. Rusiye ve Ukrayina arbiyleri al-azırda vaziyetni izaatlamadılar.
2022 senesinden başlap yarımadağa er kün ücüm ete, çoqusı allarda Rusiye Mudafaa nazirligi ya da Rusiye akimiyeti arbiy obyektlerge ücüm etilgenini tasdıqlamay.
