Rusiye nezaretindeki Aqyar başı Mihail Razvojayev deral acele yardım hadimlerini COVID-19-ğa teşkermege buyurdı. Bunışeer ükümetiniñ matbuat hızmeti bildirdi.
"Üç aftadan berli ekimlerni teşkeremiz dep aytıp yürem. Soñra acele yardımğa kele ve onıñ hadimleri teskerilmegenini bile, amma olar bu işniñ başında turalar. Şimdi olarnı birinci sırağa qoyuñız, laboratoriyamız birden olarnıteşkersin. Anda bütünley 700 adam. Bir qaç künniñ içinde er kesni teşkeriñiz. Bu ğayet müim bir buyruq", - dedi Razvojayev.
Daa evel bildirilgeni kibi Qırımda tünevin 15 yañı koronavirus adisesi qayd etildi, hastalarnıñ arasında ekimler ve balalar bar.
Böylece, Qırımda 314 koronavirus hastası qayd etildi. 25-i çetelden, 31-i qomşu Rusiye regionlarından keldi, 9 adam vefat etti. Aqyarda - 147 COVID-19 adisesi qayd etildi, eki adam öldi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
