Aqyarda noyabrniñ 6-nda saba 84 COVID-19 hastası qayd etildi. 20 hasta yuqunç ve doquzıncı şeer hastahanelerine alındı, qalğanları ambulator tedaviylevde buluna. Bu malümatnı Aqyarnıñ Rusiye ükümeti derc ete.
«Hastalar – sekiz yaşından 85 yaşına qadar yerli sakinler. 43 insan tüzelgen soñ çıqarıldı», – dep aytıla haberde.
Akimiyetniñ malümatına köre, bir künde dört insan vefat etti: 70 ve 65 yaşında er adamları, 81 ve 68 yaşlarında qadınlar.
Qayd etilgenine köre, bugünki künde COVID-19 diagnozı taslıqlanğan 301 insan hastahanede buluna: 161-i – yuqunç hastahanesinde, 138-i – doquzıncı şeer hastahanesinde, ekisi Mudafaa nazirliginiñ hastahanesinde, 32 insan – «İzumrudda». 565 kişi ambulator tedaviylevde buluna.
«599 insan közetile – bu insanlar hastalarnen alâqada oldı, amma COVID-19 qayd etilmedi. «Solnışko» pansionatı observator rejiminde çalışa», – dep qoştı müessise.
Yılnıñ başından, akimiyetniñ malümatına köre, Aqyarda 2883 insan yañı koronavirus yuqunçına oğradı, 76 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
