Link açıqlığı

Saatnıñ esas haberi

Aqyarda 74 yañı COVID-19 hastası bar, dört hasta vefat etti


Dekabrniñ 4-nde saba Aqyarda 74 yañı COVID-19 hastası bar. 23 kişi yuqunç, doquzıncı ve birinci şeer hastahanelerine alındı, qalğanları ambulator tedaviylevde buluna, dep haber ete şeerniñ Rusiye ükümeti.

«Hastalar – beş yaşından 80 yaşına qadar insanlar. 63 kişi tüzelgen soñ yiberildi. 68, 73 ve 79 yaşlarında er adamları ve 80 yaşında qadın vefat etti», – dep aytıla haberde.
Akimiyetniñ malümatına köre, umumen yılnıñ başından Aqyarda 4623 insan yañı koronavirus yuqunçına oğradı. 4164 kişi tüzeldi, 133 insan vefat etti.

Keçken künü Qırımda 251 koronavirus hastası qayd etildi. Pandemiya vaqtında 16063 COVID-19 hastası qayd etildi, 12224 kişi tüzelgen soñ yiberildi, 307 insan vefat etti.

Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG