Aqyarda noyabrniñ 9-nda saba 73 yañı COVID-19 hastası qayd etildi. 12 hasta yuqunç ve doquzıncı şeer hastahanelerine alındı, qalğanları ambulator tedaviylevde buluna, dep haber ete Aqyarnıñ Rusiye ükümeti.
«Hastalar – bir yaşından 81 yaşına qadar yerli sakinler. Yedi kişi tüzelgen soñ yiberildi. Yılnıñ başından Aqyarda 3119 insan yañı koronavirus yuqunçına oğradı. 2004 kişi tüzeldi, 79 insan vefat etti», – dep aytıla haberde.
Müessise malümatına köre, COVID-19 diagnozı tasdıqlanğan 330 insan hastahanede buluna: 161-i – yuqunç hastahanesinde, 167-si – doquzıncı şeer hastahanesinde, ekisi Rusiye Mudafaa nazirliginiñ hastahanesinde.
«680 insan ambulator tedaviylevde buluna. 649 kişi közetile – bu insanlar hastalarnen alâqada oldı, amma COVID-19 diagnozları tasdıqlanmadı», – dep aytıla haberde.
Keçken künü Qırımda 148 koronavirus hastası qayd etildi. Pandemiya başlağanından Qırımda 11016 insan koronavirusnen hastalandı, 79 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
