Aqyarda keçken künü 71 yañı koronavirus hastası qayd etildi. Bu aqta «Novıy Sevastopol» Kreml kontrolindeki şeer ükümetiniñ matbuat hızmetine esaslanıp bildirdi.
«Dekabrniñ 5-nde saba 71 yañı COVID-19 hastası qayd etildi. 22 insan yuqunç, doquzıncı ve birinci şeer hastahanelerine alındı, qalğanları ambulator tedaviylevde buluna. Hastalar – 15 yaşından 81 yaşına qadar insanlar», – dep aytıla haberde.
Yılnıñ başından Aqyarda 4694 yañı koronavirus hastası qayd etildi. Bütün müddet devamında 4259 kişi tüzeldi, 95-i keçken künü hastahaneden çıqarıldı. 136 kişi vefat etti, üçü soñki künde.
Bugünki künde COVID-19 diagnozı tasdıqlanğan 129 insan hastahanede buluna, 103 kişi «İzumrud» pansionatında, 144 insan ambulator tedaviylevde buluna.
COVID-19 diagnozı tasdıqlanmağan 626 insan közetile.
Qırımda keçken künü 261 yañı COVID-19 hastası qayd etildi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
