Dekabrniñ 8-nde saba Aqyarda 71 yañı COVID-19 hastası qayd etildi, dep haber ete şeerniñ Rusiye ükümeti.
«41 insan yuqunç, doquzıncı ve birinci şeer hastahanelerine alındı, qalğanları ambulator tedaviylevde buluna. Hastalar – altı aydan 84 yaşına qadar irnsanlar. 134 kişi tüzelgen soñ hastahaneden çıqarıldı», – dep aytıla haberde.
Akimiyetniñ malümatına köre, keçken künü 38, 48, 67 yaşında ve eki 81 yaşında erkekler vefat etti.
«Episiniñ diger hastalıqları ağırlaştı. Yılnıñ başından Aqyarda 4913 kişi yañı koronavirus yuqunçına oğradı. Al-azırda 4477 kişi tüzeldi, 148 insan vefat etti», – dep aytıla haberde.
Berilgen malümatqa köre, 103 kişi hastahanede buluna, 159 insan ambulator tedaviylevde qala.
Qırımda keçken künü 274 koronavirus hastası qayd etildi, beş hasta vefat etti. Umumen pandemiya vaqtında 17383 COVID-19 hastası qayd etildi, 13185 insan tüzelgen soñ yiberildi, 339 kişi vefat etti.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
