Aqyarda 58 yañı COVID-19 hastası qayd etildi. Şeerniñ Rusiye ükümeti haber etkenine köre, hastalar – 11 yaşından 91 yaşına qadar yerli sakinler.
Akimiyetniñ malümatına köre, 32 insan yahşı olğan soñ hastahaneden çıqarıldı. Umumen yılnıñ başından Aqyarda 1856 insan yañı koronavirus yuqunçına oğradı.
1224 insan tüzeldi, 55 kişi vefat etti.
Bugünki künde Aqyarda 248 insan COVID-19 diagnozınen hastahanede yata: 94 insan yuqunç hastahanesinde, 145 kişi doquzıncı şeer hastahanesinde, doquz insan Rusiye Mudafaa nazirliginiñ hastahanesinde yata. 66 kişi «İzumrudda» buluna. 225 insan ambulator tedaviylevde buluna.
Haberde aytılğanına köre, 400 insan közetile – bu hastalarnen alâqada olğan insanlar, amma COVID-19 diagnozları tasdıqlanmadı.
Keçken künü Qırımda 205 koronavirus hastası qayd etildi, epidemiya vaqtında 7790 COVID-19 hastası qayd etildi. Aqyarda 1743 insan yañı koronavirus yuqunçına oğradı. 1148 insan tüzeldi, 53 kişi vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
