Martnıñ 30-i sabası itibarınen Aqyarda 46 yañı koronavirus hastası qayd etilgen, ölgenler yoq. Bu aqta Rusiye nezaretinde olğan şeer memuriyetiniñ matbuat hızmeti haber ete.
Berilgen malümatqa köre, 35 adam tedaviylengen soñ hastahaneden çıqarılğan.
«Aqyarda pandemiya başlanğandan berli 13 184 adam yañı koronavirus yuqunçına oğradı, 12 192 tedaviylendi, 561 öldi, 616 közetile», – dep yazıla bildirmede.
Martnıñ 29-nda saba Aqyarda 49 yañı COVID-19 hastası qayd etildi, tüzelgen 26 insan yiberildi, 89 yaşında bir hasta vefat etti.
Martnıñ 29-nda işğal etilgen Qırımda 69 yañı koronavirus hastası qayd etildi, 3-niñ hastalıq alâmetleri yoq edi.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
