Bir künde Aqyarda 36 yañı COVID-19 hastası qayd etildi, dep bildirdi şeerniñ Rusiye ükümetiniñ matbuat hızmeti.
Qayd etilgenine köre, yahşı olğan 29 insan yiberildi, 63 ve 77 yaşında eki insan vefat etti.
«Umumen Aqyarda 13 499 kişi yañı koronavirus yuqunçına oğradı. 12 451 insan yahşı oldı, 575 kişi vefat etti», – dep aytıla haberde.
Aqyarnıñ Rusiye ükümeti 640 insan közetile, dep qoştı.
«Bu insanlar hastalarnen alâqada oldı, amma COVID-19 diagnozları tasdıqlanmadı», – dep qayd etti matbuat hızmeti.
Aprelniñ 8-nde saba Qırımda 91 yañı koronavirus hastası qayd etildi, 12-siniñ hastalıq alâmetleri yoq.
Rospotrebnadzor, Qırımnıñ yedi regionında koronavirus hastalarınıñ sayısı arta, dep bildirdi.
Qırımnıñ Rusiye sağlıq naziri Aleksandr Ostapenkonıñ brifingde aytqanına köre, işğal etilgen Qırımda 100 hasta ağır ve pek ağır alda buluna. Onıñ qayd etkenine köre, Qırımda koronavirus hastalarınıñ sayısı arta.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
