Oktâbrniñ 14-ü sabasına qadar Aqyarda 32 yañı COVID-19 hastası qayd etildi, dep bildire şeerniñ Rusiye ükümeti. Akimiyetniñ malümatına köre, hastalar – 34 yaşından 81 yaşına qadar yerli sakinler.
«62 yaşında qadın vefat etti. Hronik hastalıqları sebebinden eki taraflı virus-bakterial pnevmoniyası, keskin nefes yetmemezligi oldı», – dep aytıla haberde.
Umumen yılnıñ başından Aqyarda 1417 insan yañı koronavirus yuqunçına oğradı, 944 kişi tüzeldi, 42 insan vefat etti.
Ükümetniñ malümatına köre, al-azırda 348 insan şeerniñ hastahanelerinde buluna, 298 kişi yuqunç hastahanesinde, 240 insan №9 şeer hastahanesinde közetile, 406 insan yaşağan yerde közetile.
Keçken künü Qırımda 163 koronavirus hastası qayd etildi. Umumen Qırımda 6331 yañı koronavirus hastası qayd etildi. 107-si çetelden keldi, 128-i qomşu Rusiyeden kelgenler ve olarnen alâqada olğanlar. 3533 insan tüzeldi. Bütün müddet devamında 3639 insan tüzeldi, 93 hasta koronavirustan vefat etti. Aqyarda 1385 insan yañı koronavirus yuqunçına oğradı, 911 kişi tüzeldi, 41 hasta koronavirustan vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
