Oktâbrniñ 7-nde saba Aqyarda 27 yañı COVID-19 hastası qayd etildi, bir kişi vefat etti. Şeerniñ Rusiye ükümeti bildirgenine köre, hastalar 20 yaşından 79 yaşına qadar insanlar. Episi – yerli sakindir.
«67 yaşında qadın vefat etti. Hronik hastalıqlarınen beraber ağır virus pnevmoniyası, nefes distress-sindromı ve yuqunç-toksinli şok oldı», – dep aytıla haberde.
Akimiyetniñ malümatına köre, yılnıñ başından Aqyarda 1191 insan yañı koronavirus yuqunçına oğradı, 753 kişi tüzeldi, 3 insan vefat etti.
«Al-azırda 341 insan hastahanelerde buluna, 279 kişi yuqunç hastahanesinde közetile, 229 kişi №9 şeer hastahanesinde qala, 424 insan yaşağan yerde közetile», – dep aytıla şeer ükümetiniñ haberinde.
Keçken künü Qırımda 118 koronavirus hastası qayd etildi. Qırımda, yerli akimiyetniñ malümatına köre, 5288 koronavirus hastası qayd etildi, 3246 insan tüzeldi, 76 hasta vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
