Aqyarda tünevin 20 yañı COVID-19 hastası qayd etildi, dep bildire şeerniñ Rusiye ükümetiniñ matbuat hızmeti.
"Hastalıqqa oğrağanlar - 32-den 87 yaşınace adamlar, olarnıñ arasında 16 yerli sakin ve 4 ketirilgen adise bar edi. Daa 12 adam yahşı olıp hastahaneden çıqtı. Umumen yılnıñ başından berli Aqyarda 713 adam koronavirusnen hastalandı. Şimdilik hastahanelerde 164 adam bar. 500 adam yahşı oldı, 21 adam vefat etti", - denile beyanatta.
Qayd etilgeni kibi, infektsiya hastahanesinde 214 adam baqıla, 9-ıncı şeer hastahanesinde 179 adam bar. Yaşağan yerlerinde 470 adam közetile.
"İzumrud" ve "Solnışko" pansionatları observator rejiminde çalışa.
Tünevin Qırım Cumhuriyetinde 78 koronavirus adisesi qayd etildi. 33-ü tibbiy yardım içün muracaat etkende belli oldı, 35-i daa evel hastalanğanlarnen alâqada oldı, 10-u sağlam ealiniñ skriningi neticesinde belli oldı.
Umumen Qırımda, akimiyetniñ malümatına köre, 3 494 yañı koronavirus hastası qayd etildi, 94-ü çetelden keldi, 124-ü qomşu Rusiyeden kelgenler ve olarnen alâqada olğanlar.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
