Aqyarda bir künde 18 COVID-19 hastası qayd etildi, dep bildire şeerniñ Rusiye ükümetiniñ matbuat hızmeti.
"Hastalıqqa oğrağanlar - 10-dan 82 yaşınace adamlar, olarnıñ arasında 17 yerli sakin ve 1 tışta ketirilgen adise. Daa eki adam yahşı olıp hastahaneden çıqtı. Umumen yılnıñ başından berli Aqyarda 656 adam koronavirusnen hastalandı. Şimdilik hastahanelerde 139 adam bar. 466 adam yahşı oldı, 20 adam vefat etti", - denile beyanatta.
Ve daa müessisede qayd ettiler ki, infektsiya hastahanesinde 212 adam közetile, 9-ıncı şeer hastahanesinde 166 adam baqıla ve yaşağan yerlerinde 339 adam közetile.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
