Aqyarda daa bir yañı COVID-19 hastası qayd etildi. Hasta daa evel hastalanğanlarnen alâqada edi. Bu aqta şeerniñ Rusiye ükümeti bildire.
«Yılnıñ başından Aqyarda 179 insan yañı koronavirus yuqunçına oğradı. 151 kişi tüzeldi, 3 insan vefat etti. Bugünki künde 106 insan yuqunç hastahanesinde közetile, №9 şeer hastahanesinde – 84 kişi. 870 insan yaşağan yerinde közetile», – dep aytıla Aqyar akimiyetiniñ malümatında.
Qayd etilgenine köre, iyünniñ 11-nde keçiş noqtalarında ve tren vokzalında 329 insannıñ testi yapıldı. «İzumrud» pansionatı observator rejiminde çalışa.
Qırımda koronavirus yuqunçından vefat etkenlerniñ sayısı 16-ğa arttı.
Keçken künü işğal etilgen Qırımda yedi yañı koronavirus hastası qayd etildi. Soñki sefer COVID-19 hastasınıñ vefatı aqqında Qırımda iyünniñ 10-nda haber etilgen edi.
Akimiyetniñ malümatına köre, Qırımda 490 koronavirus hastası qayd etildi, 33-ü çetelden keldi, 87-si qomşu Rusiyeden kelgenler ve olarnen alâqada olğanlardır. 16 COVID-19 hastası vefat etti. Aqyarda 178 insan hastalandı. 151 kişi tüzeldi, 3 insan vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
