Aqyarda avgustnıñ 29-nda 14 yañı koronavirus hastası qayd etildi, dep bildire şeerniñ Rusiye akimiyeti.
Aqyarnıñ ükümeti bildirgenine köre, hastalarnıñ yaşı 27-den 83-ke qadar, 13 hasta yerli sakin ola, daa bir raatlanğan kişiniñ testi müsbet çıqtı.
«Bir qadın hastahanege yatmağa istemedi. Rospotrebnadzor mecburiy hastahanege aluv aqqında davanı mahkemege berdi», – dep aytıla haberde.
Qadın akimiyetniñ malümatnı açıq sürette izaatlamadı.
Al-azırda 67 insan hastahanede buluna, 150 insan yuqunç hastahanesinde közetile, №9 şeer hastahanesinde 125 kişi qala, 217 insan yaşağan yerinde közetile.
Umumen yılnıñ başından Aqyarda 502 insan koronavirus yuqunçına oğradı. 395 insan yahşı oldı, 18 kişi vefat etti.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
