Aqyarda bir künde 12 COVID-19 hastası qayd etildi. 11-i 36 yaşından 78 yaşına qadar yerli sakin ve biri kelgen kişi, dep bildire şeerniñ Rusiye ükümetiniñ matbuat hızmeti.
Bu malümatqa köre, tüzelgen daa 10 insan hastahaneden çıqarıldı. Yılnıñ başından Aqyarda 619 kişi yañı koronavirus yuqunçına oğradı. Al-azırda 105 insan hastahanede buluna. 464 insan yahşı oldı, 20 kişi vefat etti.
Bugünki künde 199 insan yuqunç hastahanesinde buluna, 135 kişi – №9 şeer hastahanesinde. 347 insan yaşağan yerde közetile. «İzumrud» ve «Solnışko» pansionatları observator rejiminde çalışa.
Qırımda bir künde COVID-19 diagnozı tasdıqlanğan eki hasta vefat etti. Qırımda sentâbrniñ 11-nde 69 koronavirus hastası qayd etildi.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
