Avgustnıñ 15-inde saba Aqyarda dört yañı COVID-19 adisesi qayd etildi, bildire Aqyar akimiyetiniñ matbuat hızmeti.
"Hastalanğanlarnıñ ekisi - Aqyar sakinleri, daa ekisi - tıştan kelgenler. Yılnıñ başından berli Aqyarda yañı koronavirus infektsiyasınen 412 adam hastalandı. Şimdilik hastahanelerde 60 adam yata. 326 adam yahşı oldı, 12 adam vefat etti", - denile beyanatta.
Akimiyetniñ malümatına köre, şımdilik infektsiya hastahanesinde 176 adam baqıla, 9-ıncı şeer hastahanesine 139 yata, yaşağan yerlerinde 457 adam közetile.
İlhaq etilgen Qırımda tünevin daa bir adam vefat etti. Bunı avgust 15-iniñ rusiyeli Qırım Sağlıq Nazirliginiñ statistika malümatı köstere.
Umumen Qırımda, yerli akimiyetniñ malümatına köre, 1715 yañı koronavirus hastası qayd etildi, 83-ü çetelden keldi, 112-si qomşu Rusiyeden kelgenler ve olarnen alâqada olğanlar. 1190 kişi tüzeldi, 19 hasta koronavirustan vefat etti. Aqyarda yılnıñ başından 408 insan yañı koronavirus yuqunçına oğradı, 326 insan tüzeldi, 12 kişi vefat etti.
Tünevin Qırımda 51 koronavirus hastası qayd etildi, dep bildire Qırımnıñ Rusiye yolbaşçısı Sergey Aksenov.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
