Aqyarda tünevin 11 yañı COVID-19 hastası qayd etildi, dep bildire şeerniñ Rusiye ükümeti.
"Hastalanğanlarnıñ arasında - eki tıştan kelgen ve doquz yerli adam. Hususan, bir yüklü qadınnıñ diagnozı tasdıqlandı. Hatırlatayıq, eki müsbet testten soñ qadınnı balanen beraber infektsiya hastahanesine qoydılar, anda oña kerekli tibbiy yardım yapıldı. Loqsahanede sanitar ilâclama yapıldı, şiddetli epidemiya rejimi ilân etildi", - deyler akimiyette.
Yılnıñ başından Aqyarda 371 insan yañı koronavirus yuqunçına oğradı, 306 kişi yahşı oldı, 11 insan vefat etti.
Yerli akimiyetniñ malümatına köre, Qırımda 1410 yañı koronavirus hastası qayd etildi. 75-i çetelden keldi, 112-si qomşu Rusiyeden kelgenler ve olarnen alâqada olğanlar. 1002 adam yahşı oldı, 16 adam vefat etti.
Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
