Aqyarda (Sevastopol) sentâbr 7-sinde üç kün sürecek "Russkaya Troya" festivali açıldı. Onıñ devamında seyircilerge lektsiya oquycaqlar, uruşlarnıñ rekonstruktsiyası, filmler, kontsertlerni kösterecekler, prâniklerni boyalamağa, eski çalğı aletlerinde çalmağa ögretecekler, dep bildire Qırım.Aqiqat mühbiri.
Festivalni, Aqyarnıñ rusiyeli akimiyeti ve Arbiy tarih müzey qoruğı teşkil etti. Olarnıñ aytqanına köre, tedbirniñ maqsadı - Qırım cenkinde Aqyar qorçalayıcılarnıñ hatırasını ebediyleştirmek.
Qurğanda bir qaç esas meydanlçıqlarnı tiklediler - köçüci aşhane, Medlinskiy polkunıñ soñki uruşı ve rus askerleriniñ darbeni qaytarğanı.
Müzey hadimleri, Aqyarda mina cenki aqqında ve arbiy cerrah Nikolay Pirogovnıñ faaliyeti aqqında maruza azırladı.
Aqyarnıñ rusiyeli akimiyeti, Qırım cenkinde Aqyarnı qorçalağan askerlerniñ neslini davet etti.
Aqyarda "Russkaya Troya" festivali 2017 senesinden berli keçirile.
Rusiye Qırımnı 2014 senesi işğal etmegecence, buña oşağan festival keçirilgende, müzey ekspozitsiyalarnıñ seyir etilmesi bedava edi. Bu yıl ise ekskursiyalar ücretli oldı.
Qırım cenki 1853-1856 yılları, Yaqın Şarq ve Balkanlar ükmü içün Rusiye İmperiyası ve birleşken Osmanlı Devlet, Büyük Britaniya, Frenk İmperiyası, Sardiniya Qırallığı arasında edi. Rus ordusı o zaman yutquzğan edi.
