Aqyarda koronavirus yuqunçınıñ tarqaluvı sebebinden özüni izolâtsiya etüv rejimi aprelniñ 30-na qadar uzatıldı.
Buyruqnı şeer yolbaşçısı vazifelerini eda etken Mihail Razvojayev imzaladı, dep haber etile Rusiye kontrolindeki Aqyar ükümetiniñ saytında.
«Aprelniñ 30-na qadar tek eñ yaqın tükânğa ya da aphanege barmaq, ayvanlarnı evden yüz metr mesafege çıqarmaq ve iş sebebinden (mahsus kirişlik olmalı) evden çıqmaq mümkün», – dep aytıla haberde.
Qayd etilgenine köre, aprelniñ 30-na qadar vatandaşlarnıñ bütün turistik yolculıqlarını ve mezarlıq ziyaretlerini lâğu etmege tevsiye etile. Orman, yalı, meydançıq kezintileri, qoruq-müzeyleri ve park ziyaretleri yasaqlana.
Buyruqta qayd etilgenine köre, Aqyarda «optika ve veterinar klinikaları çalışıp başlaycaq. Nevbetçi bala bağçaları işine devam etecek».
Bundan evel Aqyarda özüni izolâtsiya etüv rejimi aprelniñ 19-na qadar uzatılğan edi.
Aqyarnıñ Rusiye akimiyeti bildirgenine köre, aprelniñ 19-na qadar 11 COVID-19 hastası yuqunç hastahanesinde buluna. 85 kişi közetüv altında qala, 1665 insan yaşağan yerinde közetile. Umumen Aqyarda 16 koronavirus hastası qayd etildi, ekisi tüzeldi ve hastahaneden çıqarıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
