Aqyar bazarlarında bal çoq alalar. Limon ve zencefil paalılaşqan soñ, yerli sakinler bal sorap başladı. Qırım.Aqiqat mühbiriniñ malümatına köre, bal fiyatı şimdilik deñişmedi, zencefil ise belli bir müddet satılmay.
Qış-baar mevsimi zencefil kilosı 300-500 ruble edi. Amma karantin başlağanınen zencefil fiyatı bir buçuq biñ rublege qadar arttı, soñra ise bir kilogramm 4-5 biñ ruble oldı. Yanvar ayında limon kilosı 100 rubleden satıla edi, amma martnıñ soñunda fiyat dört qat arttı – bir kilogramm 400 ruble oldı.
Satıcılarnıñ Qırım.Aqiqat mühbirine bildirgenine köre, Rusiye akimiyetiniñ vekilleri fiyatlarnı kötermemege tevsiye etti.
Şunıñ içün 400 rublelik fiyatlarnı olar açıq köstermeyler.
Daa evel berilgen malümatqa köre, Aqmescitte zencefil satışta qalmadı, Qırımnıñ Rusiye akimiyeti bildirgenine köre, soñki künleri onıñ fiyatı 20 qat arttı.
İşğal etilgen Qırım akimiyeti bir sıra mal fiyatı artqanını qayd ete. Hususan, pişken kolbas, tuzlu ve buzlatılğan balıq, soğan, qartop, boğdan, ösümlik yağı paalılaştı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
