Aqyarnıñ 35-inci yalı batareyası rayonında belli olmağan batqan gemi tapıldı, dep yaza yerli ForPost neşiri suv astı sportu Aqyar terkibiniñ idmancısı Anna Sevastianovağa atıf etip.
Sevastianovanıñ bildirgenine köre, gemi dekabrniñ ortasında tapıldı, noyabr 26-27 künleri Qırım yarımadasında olğan küçlü furtuna Aqyarnıñ yalı boyu zonasında suvastı landşaftını deñiştirgen soñ.
"Men, anda neler ola bilecegini körmek içün daldım, ve birazdan añladım ki, anda taş degil de, el yapımı bir şey bar", - dep bildire ForPost Sevastianovanıñ sözlerini.
Neşirniñ yazğanına köre, korpusnıñ metall yapısı onıñ zemaneviy olğanını köstere. Lâkin geminiñ tarihını aydınlata bilecek bir de bir tanıma işaretleri tapılmadı.
Noyabrniñ 26-nda Qırımnı küçlü furtuna bastı - çeşit regionlarda biñlernen terek yıqıldı, yüzlernen ev zarar kördi. Qırımnıñ Rusiye akimiyetiniñ beyanatına köre, furtuna neticesinde beş insan elâk oldı. Qırımnıñ Rusiye yolbaşçısı, ilk zarar 42 milliard ruble olğanını tahmin etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
