Avgustnıñ 16-na keçer gecesi Aqyar ve Keriçte patlavlar eşitildi, Keriç köpründe maşina areketi toqtatıldı. Aqyarnıñ Rusiye akimiyeti uçucısızlarnıñ ücümi aqqında bildirdi.
Aqyarnıñ Rusiye yolbaşçısı Mihail Razvojayev bildirgenine köre, Rusiye Federatsiyasınıñ ava mudafaası Qara deñizde üç dronnı urıp tüşürgen eken. Razvojayev bunı tasdıqlaycaq bir şey köstermedi.
Bundan ğayrı, Keriç köpründe avgustnıñ 16-nda gece 3:15-ten saba 7:13-ke qadar uçucısızlarnıñ ücümi sebebinden maşina areketi toqtatılğan edi. Avgustnıñ 16-nda saba Keriçte patlavlar eşitildi. «Krımskiy veter» Telegram kanalı yazğanına köre, şeerde Sovetskaya soqağında tüşken parçalardan qaldırım zarar kördi, yol qısmen teşildi.
Keriç köprü Rusiyeden işğal etilgen Qırımğa esas yol ola ve Qırım yarımadasına arbiy taşuvlar içün qullanıla.
Telegram kanalları Aqmeçitte ve Aqmescit civarında patlavlar aqqında bildirdi.
Rusiye Federatsiyasınıñ Mudafaa nazirligi beş Ukrayina uçucısızı ve eki deñiz dronunıñ ücümi aqqında haber etti. Bu malümatnı teşkermek imkânsız ola. Keriç ve diger regionlarnıñ Rusiye akimiyeti malümatnı daa izaatlamadı. Ukrayina tarafı bu ücümlernen bağlı bir şey bildirmedi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
