Aqyarnıñ Rusiye akimiyeti bildirgenine köre, şeerge qarşı raketa ücümi neticesinde beş çoq qatlı ev, altı mustaqil ev ve 10 maşina zarar kördi. Bu aqta Rusiye kütleviy haber vastaları Aqyarnıñ Rusiye cemaat telükesizligi departamentiniñ müdiri Aleksey Krasnokutskiyniñ malümatına esaslanıp yaza.
RİA «Novosti Krım» yazğanına köre, memur 112 hızmetine parça, patlamağan silâ ve raketa parçaları tüşkenine dair 86 haber kelgenini bildirdi. Onıñ aytqanına köre, şeer sakinleri arasında yaralanğanlar yoq.
Aqyarnıñ Rusiye akimiyeti bergen malümatnı başqa menbalarda teşkermek imkânsız ola.
Avgustnıñ 2-ne keçer gecesi Aqyarnıñ Rusiye akimiyeti Rusiye Federatsiyası ava mudafaa sistemasınıñ işi ve şeerniñ bir qaç soqağında raketa parçaları tüşkeni aqqında bildirdi. Qırım.Aqiqat mühbiri qayd etkenine köre, gece küçlü bir patlav eşitildi, uçucısızğa oşamay edi, yerustü patlav kibi edi.
Ukrayına Silâlı quvetleriniñ Baş ştabı işğal etilgen Qırımda suvastı gemisi ve S-400 zenit raketa kompleksine darbe endirildi, dep bildirdi. Bu da 4 «Triumf» zenit raketa kompleksine zarar ketirdi.
Berilgen malümatqa köre, Aqyar limanında Rusiye Qara deñiz flotunıñ «Rostov-na-Donu» suvastı gemisi zarar kördi. Darbe neticesinde gemi battı, dep haber ete Ukrayına Silâlı quvetleriniñ Baş ştabı. Moskva arbiy tehnika zararları aqqında bildirmey.
Amerika Cenkni tedqiq etüv istitutı (ISW) avgustnıñ 5-nde haber etkenine köre, Ukrayına arbiyleri S-400 Rusiye zenit raketa kompleksiniñ bir donatmasını yoq etti, ddaa bir danesine ise işğal etilgen Qırımda avgustnıñ 2-nde raketa darbesi neticesinde Quş Qaya dağı rayonında zarar ketirdi. ISW «Kiberboroşno» Telegram kanalı derc etken çekimlerge esaslana. İnstitutnıñ fikirince, çekimler S-400 yoq etilgenini ve zarar körgenini köstere.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
