Gece işğal etilgen Qırım ve Aqyar uçucısız ve raketalarnıñ ücümine oğradı, ava telükesi ilân etildi, Rusiye ava mudafaası çalıştı, küçlü yanğan ve patlavlar aqqında haber etile.
"Krımskiy veter" Telegram kanalı abunecileriniñ malümatına esaslanıp haber etkenine köre, gece devamında Aqyar, Bağçasaray, Aqmescit, Ermeni Bazar ve Sivaş/Arabat beli tarafından patlavlar eşitildi. Ücümden soñ Aqmescitteye yanğın çıqtı, Aqyarnıñ bir qaç rayonında elektrik ketti, dep aytıla.
"Krımskiy veter" yazğanına köre, Rusiye ava mudafaası dron ücümine dayanamay, "mesken evler üstünde urmağa tırışa", dronlar "Ermeni Bazardaki maşina köprüne urdı, zararlar bar, yük maşinaları yandı. Tasdıqlanmağan malümatqa köre, elâk olğanlar bar". Saat 06:15-te "Ermeni Bazarda daa üç küçlü patlav oldı, yanğın çıqtı".
Telegram kanalınıñ haber etkenine köre, "Ermeni Bazar tarafından Or Qapı kirişinde köpür zarar kördi, büyük qızarıntı oldı".
"Krımskiy veter" malümatına köre, Aqyarğa raketalar ücüm etti, Kamış ve Kazak körfezlerinde eki ve soñra daa 4-5 ücüm olddı, Streletskaya körfezindeki arbiy bölükke de ücüm etildi, yanğın çıqtı.
Novofedorovkadaki "Saki" uçaq alanında saba atış ve saba saat yeyedilerde patlav aqqında haber etile.
Aqyarnıñ Rusiye akimiyeti şeerde eki kere ava telükesini ilân etip, "arbiyler Ukrayina Silâlı quvetleriniñ ücümini keri qaytarmağa tırışa, ava mudafaası ve mobil ateş gruppaları çalışa", dep bildirdi.
Rusiye Mudafaa nazirligi saba keçken gece Rusiye ava mudafaası 11 region, işğal etilgen Qırım ve Azaq ve Qara deñizlerinde 330 uçucısıznı urıp yoq etti, dep bildirdi.
Ukrayina ve Rusiye arbiyleri bu malümatnı izaatlamadılar.
Qırım.Aqiqat muarririyeti cenk vaziyetinde bu malümatnı mustaqil şekilde teşkerip olamay.
2022 senesinden başlap Qırım yarımadasınıñ territoriyasına aman-aman er kün pilotsız uçaq ve raketalar ücüm ete. Çoqusı allarda Rusiye Mudafaa nazirligi ya da Rusiye akimiyeti, bu malümatnı tasdıqlasa bile, arbiy obyektlerge zarar ketirilgenini tasdıqlamay.