«Elnen yapılğan patlayıcı cihaz vastasınen 1978 senesi doğma Aqyar sakini yarımadanıñ naqliyat infrastrukturası obyektinde diversiya yapacaq edi. Onı 2023 senesi sentâbr ayında yaqalağanlar», – dep aytıla haberde.
Erkek terakt azırlağanında, patlayıcı maddelerni qanunsız saqlağanında ve casuslıq şeklinde devlet hainliginde qabaatladılar.
İyülniñ soñunda Rostov-na-Donu şeerindeki Cenübiy rayon arbiy mahkemesi ilhaq etilgen Qırımnıñ Yalta yanındaki Koreizde gaz borusında patlav davası boyunca Ukrayina vatandaşı Sergey Yerjovnı 18 yılğa üküm etti.
FSB keçken yazda Yerjovnıñ tutulğanı aqqında haber etti. Tintüv vaqtında onıñ garajından detonatorlar ve eki kilogramm patlatıcı madde elge keçirildi, dep bildirdi FSB. FSB tutulğan adamnıñ sorğu videosını da kösterdi, o, kamera qarşısında qabaatını tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
