Aqyarda tekrar yapılğan testten soñ yañı koronavirus hastası qayd etildi. Bu aqta Kreml kontrolindeki Aqyar şeer yolbaşçısı vazifelerini eda etken Mihail Razvojayev bildirdi.
«Bugün testniñ daa bir müsbet neticesini aldıq. Bu hastanı «İzumrud» observatorından yuqunç hastahanesine avuştırdıq, çünki COVID-19 tasdıqlanğan diger hastanen alâqada olğan edi. Oğlannıñ birinci talili menfiy netice kösterdi, ekincisi ise müsbet netice kösterdi», – dep tarif etti Razvojayev.
Onıñ bildirgenine köre, alâqada olğanlar evelden belgilendi ve, onıñ fikirince, yuqturuv telükesi yoq.
Böylece, Qırımda tasdıqlanğan 51 COVID-19 hastası bar. Aqyarda 19 koronavirus hastası qayd etildi.
Qırımda ve Aqyarda özüni izolâtsiya etüv rejimi aprelniñ 30-na qadar uzatıldı.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
