Rusiyege qoltutqan bloger Aleksandr Talipovnıñ «Sevastopol SMERŞ» Telegram kanalı Ukrayınağa qoltutqan yerli sakinlerniñ şahsiy malümatını derc etip başladı.
Aqyarda Talipovnıñ şikâyetleri esasında eñ az eki yerli sakin taqip etildi, olar Instagram ve Telegramda Ukrayınağa qoltutqan izaatlar yazğan edi.
Bu yıl yanvarniñ soñunda açılğan «Sevastopol SMERŞ» kanalı Rusiye bayrağı ve Putinniñ fotosüreti yanında Rusiye ordusı, «mahsus operatsiya» ve Rusiye prezidentini «itibardan tüşürgeni» içün afu sorağan eki kişinen videonı derc etti.
Rusiye tarafdarı bloger Aleksandr Talipov «Krımskiy SMERŞ» ve «TalipoV Online Z» Telegram kanallarında Ukrayınağa qoltutqan qırımlılarnıñ şahsiy malümatını derc ete. Talipovnıñ şikâyetleri neticesinde qırımlılarnı Rusiye ordusını «itibardan tüşürgeninde» qabaatlap, memuriy ve cinaiy mesüliyetke çekeler.
Qarasuvbazar tehnikumınıñ sabıq ocası Andrey Belozerov içtimaiy ağlarda Ukrayına yırları ve Rusiyege qarşı lafları sebebinden Talipovnıñ şikâyetlerinden soñ üç yıl apis cezası berile bile.
Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
2022 senesi noyabr ayında «Krım SOS» aq qorçalayıcı teşkilâtı 9 ay devamında Rusiye mahkemeleri Rusiye ordusını «itibardan tüşürüvnen» bağlı 200-den çoq memuriy dava baqtı. Qırımlılarğa Ukrayına yırlarını diñlegenleri, Ukrayına Silâlı quvetleri ve Ukrayınağa qoltutuv şiarlarını yazğanları içün para cezalarını bereler.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
